हुतात्मा गोंडराजे शंकर शाह रघुनाथ शाह शासकीय औद्योगिक प्रशिक्षण संस्था

हुतात्मा गोंडराजे शंकर शाह रघुनाथ शाह शासकीय औद्योगिक प्रशिक्षण संस्था, किनवट येथे छत्रपती शिवाजी महाराजांच्या राज्याभिषेक दिनानिमित्त भव्य कार्यक्रमाचे आयोजन करण्यात आले. कार्यक्रमास विद्यार्थी, प्रशिक्षणार्थी, अधिकारी, कर्मचारी तसेच मान्यवरांची उत्स्फूर्त उपस्थिती लाभली. कार्यक्रमाची सुरुवात छत्रपती शिवाजी महाराजांच्या प्रतिमेस पुष्पहार अर्पण करून व दीपप्रज्वलनाने झाली; त्यानंतर महाराष्ट्र गीत व शिववंदनेने कार्यक्रमास प्रारंभ झाला.

प्रमुख वक्ते श्री. रमेश मुंडकर (माध्यमिक शिक्षक, शासकीय आश्रम शाळा, पाटोदा) यांनी छत्रपती शिवाजी महाराजांचे आदर्श राज्यकारभार, स्वराज्याची संकल्पना, न्यायव्यवस्था, सुशासन, लोककल्याण, राष्ट्रप्रेम व स्वाभिमान यांवर सखोल मार्गदर्शन केले. श्री. योगेश जाधव (पद्मजा इंडस्ट्रीज, किनवट) यांनी कौशल्य विकास, रोजगाराच्या संधी, आधुनिक तंत्रज्ञान व उद्योग क्षेत्राच्या अपेक्षांविषयी मार्गदर्शन करत तांत्रिक कौशल्यासोबत संवादकौशल्य, वेळेचे नियोजन व गुणवत्तापूर्ण कामाचे महत्त्व विशद केले.

प्रमुख पाहुणे डॉ. अनंत भालेराव (संत भगवान बाबा आर्ट अँड सायन्स कॉलेज, बोधडी) यांनी शिवरायांच्या विचारांची आजच्या काळातील उपयुक्तता अधोरेखित करत युवकांनी सामाजिक जबाबदारी, नैतिक मूल्ये व राष्ट्रनिर्मितीमध्ये सक्रिय सहभाग घ्यावा असे प्रेरणादायी आवाहन केले. विद्यार्थ्यांनी शिवचरित्रावरील भाषणे, देशभक्तीपर घोषवाक्ये व सांस्कृतिक सादरीकरणाद्वारे शिवरायांप्रती आदर व्यक्त केला. मान्यवरांचा शाल, श्रीफळ व पुष्पगुच्छ देऊन सत्कार करण्यात आला. कार्यक्रम उत्साहपूर्ण वातावरणात व यशस्वीरीत्या संपन्न झाला.